ಚಾರಣದಿಂದ ಪರ್ವತಾರೋಹಣದವರೆಗೆ ಸಾಹಸಿ 'ರಘುರಾಮ': ಎವರೆಸ್ಟ್ ಏರಿದ ಉತ್ಸಾಹಿಯಿಂದ ಕಿಲಿಮಂಜಾರೊ ಪರಾಕ್ರಮ
ಚಾರಣದಿಂದ ಪರ್ವತಾರೋಹಣದವರೆಗೆ ಸಾಹಸಿ 'ರಘುರಾಮ': ಎವರೆಸ್ಟ್ ಏರಿದ ಉತ್ಸಾಹಿಯಿಂದ ಕಿಲಿಮಂಜಾರೊ ಪರಾಕ್ರಮ
ಮೌಂಟ್ ಎವರೆಸ್ಟ್ ಏರುವುದು ಪರ್ವತಾರೋಹಿಯ ಕನಸು. ಅದೆಲ್ಲ ಸಣ್ಣ ವಯಸ್ಸಿನಲ್ಲಿ ಮಾಡುವ ಸಾಧನೆ ಎಂದು ನಿರುತ್ಸಾಹದ ಮಾತುಗಳನ್ನು ಆಡುವವರು ಒಮ್ಮೆ ರಘುರಾಮ ಎನ್ ಅವರ ಬದುಕಿನ ಸಾಧನೆಗಳನ್ನು ನೋಡಬೇಕು. ಚಿಕ್ಕಂದಿನಲ್ಲೇ ಚಾರಣದ ಹವ್ಯಾಸವಿದ್ದ ಈ ವ್ಯಕ್ತಿ ಮೌಂಟ್ ಎವರೆಸ್ಟ್ ಏರಿದ್ದು ತಮ್ಮ 43ನೇ ವಯಸ್ಸಿನಲ್ಲಾದರೆ, ಅತ್ಯಂತ ಕಠಿಣ ಪರಿಕ್ರಮ ಎಂದೇ ಹೇಳಲಾಗಿರುವ ಮೌಂಟ್ ಕಿಲಿಂಜೋದಾರೋವನ್ನು ಈಗ ತಮ್ಮ 50ನೇ ವಯಸ್ಸಿನಲ್ಲಿ ಪೂರೈಸಿದ್ದಾರೆ. ಜೀವನದಲ್ಲಿ ಪ್ರಯತ್ನ ಪಟ್ಟರೆ ಅಸಾಧ್ಯವಾದುದು ಯಾವುದೂ ಇಲ್ಲ ಎಂದೇ ಹೇಳುವ ಈ ಉತ್ಸಾಹಿ ಇವರು ``ಯೆಸ್ ಐ ಕ್ಯಾನ್ ಡು. ಯಾಕಾಗಲ್ಲ? ಒಂದು ಪ್ರಯತ್ನವಂತೂ ಮಾಡೋಣ . ಫಲಾಫಲ ಮುಂದಿನದು'' - ಹೀಗೆಂದು ಅರಳು ಹುರಿದಂತೆ ಬಲವಾದ ಆತ್ಮವಿಶ್ವಾಸದ ಮಾತುಗಳನ್ನಾಡುವವರು ಪರ್ವತಾರೋಹಿ ರಘುರಾಮ ಎನ್.
ಛಲ, ಉತ್ಸಾಹ, ಆತ್ಮವಿಶ್ವಾಸ ಎನ್ನುವುದು ಜೊತೆಗಿದ್ದರೆ ವಯಸ್ಸೆನ್ನುವುದು ಸಾಧನೆಗೆ ಅಡ್ಡಿಯಲ್ಲ ಎಂಬುದಕ್ಕೆ ಉದಾಹರಣೆಯಂತಿರುವ ವಿಶೇಷ ವ್ಯಕ್ತಿ ಇವರು. ವಿಶ್ವದ ಅತಿ ಎತ್ತರದ ಮೌಂಟ್ ಎವರೆಸ್ಟನ್ನೂ ಹತ್ತಿರುವ ಅವರು ತಮ್ಮ 50ರ ಹರೆಯದಲ್ಲಿ ಅತ್ಯಂತ ಕಠಿಣವೆಂದೇ ಹೇಳಲಾಗುವ ದಕ್ಷಿಣ ಆಫ್ರಿಕಾದ ಮೌಂಟ್ ಕಿಲಿಮಂಜಾರೊ ಟ್ರೆಕ್ ಅನ್ನೂ ಯಶಸ್ವಿಯಾಗಿ ಪೂರೈಸಿದ್ದಾರೆ.
ಔಷಧ ನಿಯಂತ್ರಣ ಇಲಾಖೆಯಲ್ಲಿ ಸಹಾಯಕ ಔಷಧ ನಿಯಂತ್ರಕರಾಗಿ (Assistant Drugs Controller) ಹುಬ್ಬಳ್ಳಿಯಲ್ಲಿ ಸೇವೆ ಸಲ್ಲಿಸುತ್ತಿರುವ ಇವರು ಮೂಲತಃ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ನೆಲಮಂಗಲ ಸಮೀಪದ ನಿಡುವಂದದವರು.
ಸಮೀಪದ ತ್ಯಾಮಗೊಂಡ್ಲು ಇವರ ತಾಯಿಯ ತವರು. ಬಾಲ್ಯವನ್ನು ಇಲ್ಲೇ ಹೆಚ್ಚು ಕಳೆದಿರುವ ಇವರು ಈ ಗ್ರಾಮದ ವಾತಾವರಣದಿಂದ ಪ್ರೇರಣೆಗೊಂಡವರು. ಪ್ರಾಥಮಿಕ ಶಿಕ್ಷಣ ಅಜ್ಜಿಯ ಊರಲ್ಲೇ ಪಡೆದು ಮುಂದೆ ಪ್ರೌಢ ಹಾಗೂ ಕಾಲೇಜು ಶಿಕ್ಷಣವನ್ನು ಬೆಂಗಳೂರಿನಲ್ಲಿ ಪೂರೈಸಿದ್ದಾರೆ. ತುಮಕೂರಿನ ಸಿದ್ಧಗಂಗಾಮಠದ ಕಾಲೇಜ್ ನಲ್ಲಿ ಬಿ.ಫಾರ್ಮ್ ಓದಿ 7 ಜಿಲ್ಲೆ ವ್ಯಾಪ್ತಿಯ ಡ್ರಗ್ ಇನ್ಸಪೆಕ್ಟರ್ ಆಗಿ ಕಲಬುರಗಿಯಲ್ಲಿ ಸೇವೆ ಆರಂಭಿಸಿದರು.
ಟ್ರೆಕ್ಕಿಂಗ್ ಅಂದ್ರೆ ಪಂಚಪ್ರಾಣ
ಇವರ ತಮ್ಮ ಊರು ಬಳಿಯ ದಾಬಸಪೇಟನವರಾದ ರಜನೀಕಾಂತ ಎನ್ನುವ ವ್ಯಕ್ತಿ ಇವರ ಜೀವನದಲ್ಲಿ ಅಥವಾ ಇವರ ಸಾಧನೆಯಲ್ಲಿ ಬಲು ದೊಡ್ಡ ಪಾತ್ರ ಹೊಂದಿದ್ದಾರೆ. ಬೆಂಗಳೂರಿನಲ್ಲಿ ಪೆಸ್ಟಿಸೈಡ್ ಕಂಪನಿ ಹೊಂದಿರುವ ರಜನೀಕಾಂತರ ಒಡನಾಟ ಇವರಲ್ಲಿ ಹಲವು ಹವ್ಯಾಸಗಳ ಬೀಜ ಮೊಳಕೆಯೊಡಲು ಕಾರಣವಾಯಿತು. ರಜನೀಕಾಂತ ಅವರು ಸಹ ಕ್ರಿಯಾಶೀಲ ವ್ಯಕ್ತಿ. ಇವರಿಗೆ ಚಾರಣದ ಹವ್ಯಾಸ ಶುರು ಮಾಡಿಸಿದ್ದೇ ಅವರು. 2005ರಲ್ಲಿ ನಾಗರಹೊಳೆ ಪ್ರವಾಸದಲ್ಲಿನ ಚಾರಣ ಇವರ ಚೊಚ್ಚಲ ಟ್ರೆಕ್ಕಿಂಗ್. ಅಲ್ಲಿಂದ ಶುರುವಾದ ಇವರ ಟ್ರೆಕ್ಕಿಂಗ್ ಇಂದಿಗೂ ನಿರಂತರವಾಗಿ ಸಾಗಿದೆ. ಬೆಳಗಾವಿಯಿಂದ ಹುಬ್ಬಳ್ಳಿವರೆಗೆ 12 ತಾಸಿನಲ್ಲಿ 200 ಕಿಮೀ ಸೈಕ್ಲಿಂಗ್ ಕೂಡ ಮಾಡಿದ್ದಾರೆ.
ಮೌಂಟ್ ಎವರೆಸ್ಟನ್ನೂ ಏರಿದ್ದಾರೆ!
ತಾವು ಅಳವಡಿಸಿಕೊಂಡಿರುವ ಹವ್ಯಾಸಗಳಲ್ಲಿ ಇವರಿಗೆ ಟ್ರೆಕ್ಕಿಂಗ್ ಬಲು ಇಷ್ಟ. ಈ ಚಾರಣದ ಹವ್ಯಾಸವೇ ಮುಂದೆ 2016ರ ಮೇನಲ್ಲಿ ಗುರುಗಳಾ ದ ರಜನೀಕಾಂತ ಅವರೊಡನೆ ಸೇರಿ 15 ದಿನದ ಅವಧಿಯಲ್ಲಿ ಮೌಂಟ್ ಎವರೆಸ್ಟ್ ಹತ್ತಿ ಬಂದಿದ್ದಾರೆ. ಈವರೆಗೆ 21 ದೇಶ ಸುತ್ತಾಡಿ ಅಲ್ಲಿನ ಭೌಗೋಳಿಕ ಮತ್ತು ಸಾಂಸ್ಕೃತಿಕ ಜ್ಞಾನ ಪಡೆದುಕೊಂಡಿದ್ದಾರೆ. 56 ದಿನಗಳಲ್ಲಿ 25 ನಗರಗಳಿಗೆ ಭೇಟಿ ನೀಡಿದ್ದಾರೆ. 2023ರ ಜುಲೈ 10 ರಿಂದ 22 ರವರೆಗೆ ದಕ್ಷಿಣ ಆಫ್ರಿಕಾದ ಮೌಂಟ್ ಕಿಲಿಮಂಜಾರೊ ಟ್ರೆಕ್(5795ಮೀಟರ್ ಎತ್ತರ) ನ್ನು ಯಶಸ್ವಿಯಾಗಿ ಮುಗಿಸಿ ಬಂದಿದ್ದಾರೆ.
ಹೊಸ ಅನ್ವೇಷಣೆಗೆ ತುಡಿವ ಮನಸ್ಸು
ಪ್ರಸ್ತುತ ಹುಬ್ಬಳ್ಳಿ ಹಾಗೂ ಬೆಳಗಾವಿಯಲ್ಲಿ ಚಾರಣಪ್ರಿಯರ ತಂಡ ಕಟ್ಟಿಕೊಂಡು ವಾರಾಂತ್ಯಕ್ಕೆ ಚಾರಣ ಹೋಗುವ ಇವರು ಸದಾ ಹೊಸ ಸ್ಥಳ, ಹೊಸತನಕ್ಕೆ ಹಂಬಲಿಸುವವರು. ಒಂದರ್ಥದಲ್ಲಿ ಹೇಳಬೇಕೆಂದರೆ ಇವರ ಮನಸ್ಸು ಏನೋ ಒಂದು ಅನ್ವೇಷಣೆಗೆ ತುಡಿಯುತ್ತಿರುತ್ತದೆ. ಕರ್ತವ್ಯಕ್ಕೆ ಚ್ಯುತಿಯಾಗದಂತೆ ಹವ್ಯಾಸಗಳಿಗೂ ಧಕ್ಕೆಯಾಗದಂತೆ ಸಮತೋಲಿತ ಜೀವನಶೈಲಿ ಇವರ ವಿಶೇಷತೆಗಳಲ್ಲೊಂದು. ಹುಬ್ಬಳ್ಳಿಗೆ ಬರುವ ಮುನ್ನ ಬೆಳಗಾವಿಯಲ್ಲಿ ಸೇವೆಯಲ್ಲಿರುವಾಗ ಸ್ವಂತ ಮನೆ ಹೊಂದಿರುವ ಇವರು ತಾವು ವಾಸಿಸುವ ಅಪಾರ್ಟ್ ಮೆಂಟಿನ ನಿವಾಸಿಗಳನ್ನು ಸಂಘಟಿಸಿ ಅವರಲ್ಲಿ ಸಾಂಸ್ಕೃತಿಕ ಪ್ರಜ್ಞೆಯನ್ನು ಬಿತ್ತಿದವರು. ಹಬ್ಬ ಹರಿದಿನದಂದು ಸಾಮೂಹಿಕ ಪೂಜೆ, ಅನ್ನಸಂತರ್ಪಣೆ ಜತೆಗೆ ಕರೋಕೆ ಹಾಡುಗಾರಿಕೆ ಆಯೋಜಿಸಿ ಒಗ್ಗಟ್ಟಿಗೆ ಶ್ರಮಿಸುತ್ತಿದ್ದಾರೆ.
ಸರಳ ಬದುಕು, ಆತ್ಮೀಯ ವ್ಯಕ್ತಿತ್ವ
ಡೌನ್ ಟು ಅರ್ಥ ಎಂಬ ಪದಕ್ಕೆ ಈ ವ್ಯಕ್ತಿ ಅನ್ವರ್ಥಕ. ಹೌದು ತುಂಬಾ ಸರಳತೆ, ಆತ್ಮೀಯತೆ ತುಂಬಿದ ಮಾತು. ಎಲ್ಲರ ಕಷ್ಟಗಳಲ್ಲಿ ಭಾಗಿಯಾಗುವ ಮನೋಭಾವ. ಮಾನವೀಯತೆಗೆ ಬೆಲೆ ಕೊಡುವ ಮಮತಾಮಯಿ. ಉನ್ನತ ಹುದ್ದೆಯಲ್ಲಿದ್ದರೂ ಯಾವುದೇ ಹಮ್ಮು ಬಿಮ್ಮು ಇಲ್ಲದ ಸರಳ ವ್ಯಕ್ತಿತ್ವ. ತಮ್ಮ ಇಲಾಖೆ ವತಿಯಿಂದ ಪ್ರತಿ ವರ್ಷ ರಕ್ತದಾನ ಶಿಬಿರ ಏರ್ಪಡಿಸುವ ಇವರು ಈವರೆಗೆ 23 ಬಾರಿ ರಕ್ತದಾನ ಶಿಬಿರ ಆಯೋಜಿಸಿದ್ದಾರೆ. 2023ರ ಆ.15ಕ್ಕೆ ಆಯೋಜಿಸಿದ್ದ ಶಿಬಿರದಲ್ಲಿ 936 ಯುನಿಟ್‌ನಷ್ಟು ರಕ್ತ ಸಂಗ್ರಹ ಗುರಿ ತಲುಪಿದ್ದಾರೆ. ಇದಲ್ಲದೇ ಮಾದಕ ವಸ್ತುಗಳ ದುಷ್ಪರಿಣಾಮಗಳ ಬಗ್ಗೆ ಜಾಗೃತಿ ಓಟ, ತಿಳಿವಳಿಕೆ ಕಾರ್ಯಾಗಾರಗಳನ್ನು ಕೂಡ ನಿಯಮಿತವಾಗಿ ಮಾಡುತ್ತಿದ್ದಾರೆ.
2010ರಲ್ಲಿ ಬೆಸ್ಟ್ ಡ್ರಗ್ ಇನ್ಸಪೆಕ್ಟರ್ ಪ್ರಶಸ್ತಿ ಪಡೆದಿದ್ದಾರೆ. ಇಲಾಖೆಯಲ್ಲಿನ ಇವರ ಕಾರ್ಯವೈಖರಿ ಗುರುತಿಸಿ ಸರಕಾರ ಅತ್ಯುತ್ತಮ ಸಹಾಯಕ ಔಷಧ ನಿಯಂತ್ರಕ ಎಂಬ ಪ್ರಶಸ್ತಿ ನೀಡಿ ಗೌರವಿಸಿದೆ. ಬೆಳಗಾವಿ ಫ್ರೆಂಡ್ಸ್ ಕ್ಲಬ್ ನ ಉಪಾಧ್ಯಕ್ಷರಾಗಿಯೂ ಸೇವೆ ಸಲ್ಲಿಸುತ್ತಿದ್ದಾರೆ. ಕಳೆದ ವರ್ಷ ನಡೆದ ಮುಂಬೈ ಹಾಫ್ ಮ್ಯಾರಾಥಾನ್‌ನಲ್ಲಿ 21 ಕಿಮೀ ಓಡಿದ್ದಾರೆ. 2023ರ ಫೆಬ್ರುವರಿಯಲ್ಲಿ ಬೆಳಗಾವಿಯಲ್ಲಿ ಸೂಪರ್ ಬಿಯಿಂಗ್ ೨೦೨೩ ಎಂಬ ಟ್ರೆಯಥ್ಲಾನ್ ನ ಯಶಸ್ವಿ ಸಂಘಟಕರಲ್ಲೊಬ್ಬರು ಇವರು.
ಸರಳ ವ್ಯಕ್ತಿತ್ವ, ಪಾದರಸದಂತೆ ಚುರುಕುತನ
ರಘುರಾಮ ಅವರು ವ್ಯಕ್ತಿ ಎನ್ನುವುದಕ್ಕಿಂತ ಶಕ್ತಿ ಎಂದರೆ ಅತಿಶಯೋಕ್ತಿಯಾಗದು. ಸದಾ ಪಾದರಸದಂತೆ ಕ್ರಿಯಾಶೀಲವಾಗಿರುವ ಚಟುವಟಿಕೆಗಳ ಚಿಲುಮೆಯಂತಿರುವ ಇವರು ಹಲವು ಆರೋಗ್ಯಕರ ಉತ್ತಮ ಹವ್ಯಾಸಗಳನ್ನು ಹೊಂದಿದ್ದಾರೆ. ಸೈಕ್ಲಿಂಗ್, ಟ್ರೆಕ್ಕಿಂಗ್, ಮ್ಯಾರಾಥಾನ್, ಲಾನ್ ಟೆನ್ನಿಸ್, ಕರೋಕೆ ಸಿಂಗಿಂಗ್, ರಕ್ತದಾನ ಶಿಬಿರ, ಸಮಾಜಮುಖಿ ಕಾರ್ಯಕ್ರಮ ಆಯೋಜನೆ ಹೀಗೆ ಹತ್ತು ಹಲವು ಕ್ಷೇತ್ರಗಳಲ್ಲಿ ಇವರು ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ.
ಕಲಬುರಗಿಯಲ್ಲಿ ವೃತ್ತಿ ಜೀವನ ಆರಂಭಿಸಿದಾಗ ಇನ್ಸ್ ಪೆಕ್ಟರ್ ನಿರಂಜನ ಪಾಟೀಲ, ಹಿರಿಯ ಪೊಲೀಸ್ ಅಧಿಕಾರಿ ಎನ್. ಸತೀಶಕುಮಾರ ಹಾಗೂ ತ್ಯಾಗರಾಜನ್, ವಾಸು, ಡಾ.ರಘುಕೃಷ್ಣಮೂರ್ತಿ ಸೇರಿದಂತೆ ಹಲವು ಸಮಾನ ಮನಸ್ಕರ ತಂಡ ಕಟ್ಟಿಕೊಂಡು ಲಾನ್ ಟೆನ್ನಿಸ್ ಪಯಣ ಆರಂಭಿಸಿದವರು ರಘುರಾಮ ಅವರು.
ಈ ಬಗ್ಗೆ ರಘುನಾಥ್ ಅವರನ್ನೇ ಕೇಳಿದರೆ, ``ಜೀವನದಲ್ಲಿ ಪ್ರಯತ್ನ ಪಟ್ಟರೆ ಅಸಾಧ್ಯವಾದುದು ಯಾವುದೂ ಇಲ್ಲ. ಸರಳತೆ, ಶ್ರದ್ಧೆ ಮತ್ತು ಆತ್ಮವಿಶ್ವಾಸವಿದ್ದರೆ ಏನನ್ನಾದರೂ ಸಾಧಿಸಬಹುದು. ಮನುಷ್ಯ ಸಮಾಜಮುಖಿ ಚಿಂತನೆಗಳ ಜತೆಗೆ ಸಂಘಜೀವಿಯಾಗಿರಬೇಕು. ಉತಮ ಹವ್ಯಾಸಗಳಿದ್ದರೆ ದೈಹಿಕ ಹಾಗೂ ಮಾನಸಿಕ ಸ್ವಾಸ್ಥ್ಯವೂ ಉತ್ತಮವಾಗಿರುತ್ತದೆ. ಇದು ಸಾಧನೆಗೆ ಸ್ಪೂರ್ತಿ ನೀಡುತ್ತದೆ'' ಎಂದು ಉಲ್ಲಸಿತರಾಗಿ ನುಡಿಯುತ್ತಾರೆ.